- RHEMI vulgo REIMS
- RHEMI, vulgo REIMSpopuli et urbs Galliae Belgicae Archiepiscopalis, et Campaniae metropolis, a Rhemo Galliae rege, ut quidam volunt, dicta, ubi Galliae reges inaugurantur; Populi Rhemenses, et Rhemi. Baudrando vero melius Remi dicuntur. Vide ibi, quorum urbs etiam Durocortorum dicitur, ad Vidulam fluv. ampla, elegans, culta, et Academiâ, ab Henrico II. institutâ, insignis, cum titulo Ducatus. Huius Archiepiscopus est primus Dux et Par Franciae, a quo Reges consecrari solent, 32. leuc. a Lutetia, versus Ortum aestiv. 12. a Suessione in Ortum, 9. a Catalauno in Circium, 5. a Matrona fluv. in Boream, uti fere 14. a Viroduno in Occasum. Tractus adiacens le Remois, inter Treviros et Virodunos ad Ortum, Catalaunos ad Meridiem, Suessiones ad Occasum, et Arduennam silvam ad Boream. Hic a Carolo M. Concilium, habitum, A. C. 806. Aliud A. C. 1131. in quo Bernardus vitia Cleri et Pontificum summâ oris libertate reprehendit. Lucanus, l. 1. v. 424.Optimus excussô Leucus, Rhemusque lacertô.
Hofmann J. Lexicon universale. 1698.